நான் பனை

யாரின்

கனிவுக்காகவும்

காத்திருப்பதில்லை

நான்

 கூடைகளுக்காகவும்

துயில் பாய்களுக்காகவும்

என் துகிலை அரிந்து கொள்ளலாம்

நீங்கள்

குருத்தோலை நாட்களிலும்

புஞ்சை காட்டு வேலைக் காலங்களிலும்

 குறுத்தரிந்து

சிலுவைகளாக

கஞ்சிப் பட்டைகளாக

உருவாக்கிக் கொள்ளுங்கள்

சுபகாரிய தோரணங்களில்

பெரு விழாக்களில்

என் குலை அரிந்து

ஓலை அரிந்து உங்கள் வாழ்விடங்களை

அலங்கரித்துக் கொள்ளுங்கள்

காட்டுப் பயிர்களையும்

வீட்டுக் காவல்களையும்

கருக்கு மட்டைகளால்

காத்துக் கொள்ளுங்கள்

உங்கள் போதைக்கு

என் பதநீரை கள்ளாக்கிக்

கொள்ளுங்கள்

சூடு தணிக்க

என்

நுங்கை அருந்துங்கள்

 பிள்ளைகள்

சிறுதேர் உருட்டி விளையாட

நுங்கு நீக்கிய

என் கூந்தல்களை

சக்கரமாக்கிக் கொள்ளுங்கள்

உங்கள் சாதிச் சண்டைகளில்

என் கருக்கு மட்டைகளை

 ஆயுதமாக்கிக் கொள்வீர்கள்

ஆனாலும்

நீங்கள் என் வேர்களில்

நீர் ஊற்ற

பிரயாசைப் பட வேண்டாம்

 மழை பொய்த்தாலும்

சூரியன் காய்ந்தாலும் அன்றி

 உங்கள் மனம் 

காய்ந்தாலும்

காயாமல் கனிவேன்

நான் பனை.